انا شاب مصر قعدت اتعلم واخد دروس واروح مدارس وجامعة وقرف كل ده علشان اتخرج ابقي مواطن محترم اشتغل اتجوز افتح بيت يعنى سنن الحياة الموجوده يعنى
اللى كل الناس بتعيشها
بعد 19 سنة تعليم من عمرى
3 حضانة
5 ابتدائى
3 اعدادى
3 ثانوى
5 كلية هما المفروض 4 بس علشان خاطر حبي للتعليم خدتهم 5
اتخرجت وانا عندى 22 سنة وطبعا كل حاجة واقفة علشان خاطر مصر مفيش شغل مفيش سفر مفيش حرية مفيش اى حاجة
لازم اروح اقدم ورقي للجيش اروح منطقة التجنيد واعمل فيش وتشبية واجهز ورقى والليلة زى الفل
اكتشفت ان الجيش ازمة كل طالب مصري
اللى تلاقية متمنى يكون وحيد علشان ميدخلش الجيش
واللى يقولك يارب اكون تعبان علشان مدخلش الجيش عندى اى مرض
يعنى تخيلوا الجيش وصل الناس انها تتمنى انها تكون مريضة علشان متدخلش !!
لدرجة ان زمان كان واحد ممكن يقطع صابعة علشان ميدخلش الجيش @@
والحمد لله مصر كلها نجحت في الكشف الا اللى لية واسطة واحد صاحبة طبيب في المنطقة يظبطة او واسطة كبيرة
وبعد الكشف تستنى تاخد ال 110 بتاعك وطبعا علشان ورقة تتطبع من على الكمبيوتر وتتختم يبقي المفروض سيادتك تقعد في الشمس من 7 صباحا لحد 3 العصر منتظر
يحنوا على اهلك ويدوك الورقة !!
وييجي يوم الارجا اللى المفروض يقولك مواليدك اما تنجو او تلبس سنة او تلبس 3 سنين
يوم الارجا ده عبارة بيوقفوك كده ويجيلهم ورقة تاريخ مثلا من 15-1-86 لحد 12-2-86 دول تاجيل ومن 13-2 لحد 18-2 دول داخلين كده
لكن المفاجاة بقي نادوا التخصصات الاول
طب .. صيدلة .. اقسام في هندسة اقسام في علوم حاجات كده لغات بتاع
حاسبات
انتوا محتاجنكوا ظباط لابسين 3 سنين بدون اى حاجة والا ارجا والا بتاع تعالوا بكرة حللوا فيرس سي وطبعا الكلام ده بتعرفوا بعد ما تقعد 6 او 7 ساعات في الشمس او
البرد يعنى من 7 الصبح ل 2 الظهر
وتيجي علشان تحلل فيرس سي تقعد بردة مستنى وفي الاخر بردة تمشي بعد الظهر
وتروح كشف الهيئة حلمية الزتون القاهرة
والمفاجاة نروح الساعة 7 هناك واللى جاي من طنطا والمنوفية وبتاع
ولولولولولى تعالوا بكرة انتوا يومكوا بكرة هندسة بس اللى النهاردة الطبيعي والله الكلمة اللى تتقال في الموقف ده من 3 حروف يعنى
ونروح بكرة ونكشف ونمشي بردة الساعة 3 وكلة سليم مفيكوش عيب وروح اسمع النتيسجة في منطقتكوا
لائق وظباط تعالوا بقي كمان كام يوم في الماظة القاهرة تكشفوا سمات علشان يعرف سمتك ظابط والا لا وتحللوا دم
ونروح نتهبب والساعة 7 الصبح وعلشان نكشف ونكشف بسرعة والامور تمشي بسرعة ومستحيل نخرج الساعة 9 مش هيا دى مصر يا سعدا انا مش مصدق نفسي
خلصنا بالسرعة دى وفية نظام وبتاع تعالوا بقي قبل ما تمشوا امضوا على الورقة دى
الورقة دى اقرار ان مفيش تحليل دم ليكوا النهاردة تعالوا كمان اسبوع الساعة 7 تحللوا دم تانى في الماظة ونفس الكلمة المفروض تتقال لكن الواحد بيكتم جوة نفسة !!
ونروح الماظة تانى ونهبب ياخدوا نص دمنا بس يعنى بردة بنخلص بسرعة ولسة فية كشف بقي مناظرة الظباط الاحتياط تروحوا يوم 12 تقعدوا مع الناس في حلمية
الزتون
وفي المناظرة دى بقي يا اما ظابط وتخس كمان 3 اشهر
يا اما عسكري ويقولولك تعالى بكرة مجهز نفسك هتترحل بكرة
ومفيش اختيار تالت
وكل ده لية علشان مكتوب في بطاقتك مصري
يا حبيبتي يا مصر
وانتظرونا قريبا مع يومياتى من داخل الجيش !!
